ЈП ГРАДСКИ ПАРКИНГ- СКОПЈЕ

БЛОКАТОРИ ЗА ТРКАЛА- ЛИСИЦИ

Блокаторите за тркала ќе се поставуваат на: „оние возила кои не извршиле плаќање на услугата за паркирање, доплатен билет или други трошоци на начин посочен во Одлуката за јавни паркиралишта од значење за градот Скопје“ при што „ќе се смета дека паркирањето е непрописно и Овластено лице на организаторот на паркирањето може да побара блокирање на тркалата со лисици- блокатори на тркала или отстранување на возилото од јавното паркиралиште со специјално возило Пајак.“ (член 12 од Правилникот...).

На возилата на кои ќе им биде поставен блокатор за тркало- лисици, ќе биде прикачена писмена опомена во форма на налепница со која имателот на возилото се предупредува да внимава бидејќи на возилото е прикачен блокатор на тркало. Покрај предупредувањето, Известувањето содржи и телефонски број на кој сопственикот на возилото се повикува да се обрати како би му биле отстранети лисиците со објаснување дека: „доколку за еден час од моментот на поставување на средството за блокирање не се јавите за деблокирање, Вашето возило ќе биде дислоцирано со помош на специјално возило- Пајак“. Покрај телефонскиот број, испишана е и адресата/ седиштето на депо на Сектор Пајак како и работното време во кое ќе може да го подигнат своето возило. Налепниците ќе ги поставуваат комунални инспектори- редари односно, вработените во ЈП Градски паркинг- Скопје.

По поставување на блокатор/ лисици, доколку сопственикот на возилото не се појави во рок од 60 (шеесет) минути од моментот на поставување на истите, возилото ќе биде транспортирано во депо на Сектор Пајак. Во посебно одреден простор во депо на Сектор Пајак возилата ќе бидат складирани во присуство на работник на ЈП Градски паркинг- Скопје.

Доколку имателот на возилото во рок од 30 (триесет) дена од денот на отстранување на возилото од јавна површина не се јави за да го побара своето возило, истото во присуство на комунален инспектор со Записник ќе му биде вратено при што странката ќе биде задолжена да ги надомести сите настанати трошоците за подигање на возилото согласно на Ценовникот на услугите на ЈП Градски паркинг- Скопје. Во спротивно ќе се смета дека тој на несомнен начин ја изразил својата воља односно, дека возилото не го смета за своја сопственост. Во ваква ситуација ЈП Градски паркинг- Скопје не сноси никаква одговорност за натамошната судбина на тие возила.

(Овој Правилник... е донесен на седница Управниот Одбор на ЈП Градски паркинг- Скопје одржана на ден 25 Февруари 2010 година).